Едно истражување открива дека луѓето кои имаат добри работни места, или кои бргу напредувале на работа, страдаат од зголемено количество стрес.
Научниците посебно укажуваат на зголемено ниво на стресот кај луѓето кои добиле унапредување, дури и за 10 проценти во однос на другите колеги на работа.

Напредувањето на работа не е секогаш добра вест, како што мислат луѓето. Нашето истражување покажа дека луѓето на одлични позиции во компаниите повеќе страдаат од некои ментални тегоби од нивните колеги, вели Крис Бојс, еден од научниците кои го вршеле ова истражување.

Во истражувањето учествувале една илјада луѓе, високо позиционирани на работното место или кои неодамна напредувале на работа.

Стресот на повеќе начини влијае врз здравјето и секојдневните активности на човекот. Тој влијае врз концентрацијата, помнење и се смета за главен придвижувач за низа болести.

Кога се под стрес, луѓето чувствуваат замор, страдаат од хроничен недостиг на време, недостиг на мотивација, претерана критичност кон другите, но и кон себе, импулсивно однесување, несоница, како и компулсивно бавење со проблемите од работа надвор од работното време. Забележано е и подолго закрепнување од болести, па дури и најобичните како што е настинката.

Таквата состојба конечно води и до физички колапс.

Се поголем број луѓе во современиот свет, од незнаење и игнорирање на сигналите на стресот, трпат психофизички тегоби долг временски период, оштетувајќи на тој начин одредени невролошки функции или органи во телото.