Во Алејата на народните херои во Паркот на револуцијата повторно се поставени седум бисти на хероите Кире Гавриловски, Орде Чопела, Рампо Левката, Борка Талески, Круме Волнароски, Лазо Филипоски и Борка Велески- Горанов, кои пред две години беа украдени.Ова е единствениот начин да бидеме современици на нашите претходници, да ја браниме историјата и да испишуваме нови страници. Културата и историјата се нашиот идентитет, она што не прави различни и посебни, но и она што не зближува и не поврзува со Европа, истакна министерката за култура Елизабета Канческа Милеска на денешната пригодна свеченост на откривањето на бистите во Алејата на хероите.

За Методија Костоски од Сојузот на прилепските борци алејата е доказот за херојското минато на градот, на неговите жители и ова е враќање на достоинството. Според градоначалникот Марјан Ристески исправена е неправдата што на градот и на прилепчани им е нанесена кога бистите беа украдени. Апелот се уште е отворен да се пронајдат крадците и најстрого да се казнат. Седумте бронзени бисти на хероите повторно ги изработи прилепскиот скулптор Емил Солески. За нивната изработка се одвоени 1,3 милиони денари во кои со 40 насто учествува Министерството за култура. На Могилата на непобедените во Паркот на револуцијата во Прилеп се моштите на 650 борци од НОБ, а во алејата на хероите се бистите на 10-те од 15-те народни херои кои градот ги дал во народната револуција.