Ексклузивно: Фановите од регионот ја избираат обвивката за новото CD на Тоше Проески

Ексклузивно: Фановите од регионот ја избираат обвивката за новото CD на Тоше Проески

Но, без оглед што Тоше ги одработи сите напорни снимања во Ирска, на Јамајка, во Лондон и Стокхолм, за жал не успеа да стави шлаг на тортата и да одбере обвивка за својот албум наменет за светскиот музички пазар, за кој потроши стотина последни работни часови од својот живот.

Со дозвола на Меѓународната фондација која го носи името на Тоше, менаџерката Љиљана Петровиќ и продукцијата Award решија одлуката за избор на каверот за тој албум во потполност да ја препуштат на верната публика и многубројните фанови на Тоше.

Гласот на Тоше секогаш беше пресуден во изборот на обвивка за неговите албуми. За жал не го доживеа излегувањето на најважното CD во кариерата, па решивме гласот на Тоше, во изборот на обвивката, да го отстапиме на неговите фанови и почитувачи на неговото дело, бидејќи благодарение на нив, тој и понатаму преку своите песни живее во стотина илјади домови – вели Љиљана Петровиќ.

Предложените идејни решенија за обвивка за албумот од среда, 10. декември во 10 часот ќе бидат ексклузивно објавени на по еден одбран портал во неколку земји, во кои Тоше ги полнеше концертните простори. Честа македонските фанови да го изберат идејното решение ја имаат посетителите на MMM.com.mk. Во Хрватска тоа им е овозможено на читателите на еден од највлијателните тамошни портали – Index.hr, додека во Словенија таа чест им припаѓа на посетителите на Siol.net и Planet.si. Во Босна и Херцеговина изборот падна на web-порталот Sarajevo-x.com, а во Србија ќе гласаат посетителите на Svetplus.com.

Читателите на порталите, верната публика на Тоше и неговите многубројни фанови, ексклузивно ќе можат да ги видат сите четири предложени идејни решенија, од кои едно ќе биде избрано за обвивка на последниот албум на Тоше. Својот глас за еден од предлозите ќе можете да го дадете на нашата анкета, а подолу во текстот, во делот предвиден за коментарите, ќе можете да оставите своето размислување, пофалба и критика.

Кога ќе се збројат гласовите од сите портали, ќе падне одлука која обвивка на 25-ти декември ќе замине на печатење.

Сигурна сум дека на Тоше идејата неговата публика активно да учествува во создавањето на неговиот албум, многу би му се допаднала. Одбраниот кавер на накој начин ќе претставува подарок од неговата публика за неговиот 28-ми роденден, кој би го прославил на 25-ти јануари.

Тој ден, албумот The Hardest Thing ќе се најде на пазарот во шестте земји од регионот, а во поголемите градови во Македонија, Хрватска, Србија, Босна и Херцеговина и Словенија ќе осамнат 500 билборди.

Тоа е подарок за споменот на Тоше од сите нас, кои ја имавме честа да соработуваме со него – кажа Љиљана Петровиќ.

Важно: Гласањето е отворено до 20-ти декември 2008-ма!

Вашиот глас за еден од четирите предлози дајте го во АНКЕТАТА која се наоѓа во левата колона на порталот!